Oppussing: Slik sorterer du avfallet

Rett sortering sørger for at materiale kan nyttast om igjen eller gjenvinnast. Dette sparar både ressursar og energi. I tillegg blir farleg avfall handtert på ein trygg og god måte, slik at jordsmonn eller vatn ikkje blir forureina. Feilsortert avfall kan føre til at miljøskadelege stoff hamnar i naturen, at det oppstår brann, eller at gjenvinningsprosessen blir øydelagd.

– Eit godt tips er at du sorterer godt før du kjem inn til oss, så sparar vi mykje tid, seier stasjonsleiar på Midtstegen gjenbruksstasjon, Richard Saure.

Mykje kan gjenvinnast

Besøket på gjenbruksstasjonen går raskare for deg, og avfallet blir kasta på rett stad, noko som er bra for miljøet. Vi sørger nemlig for at det som kan, går til gjenvinning.

– Viss ein har reint trevirke, så går det på ein konteinar for reint trevirke. Det gjer ingenting om det er måla, men reint og fint trevirke som har vore brukt inne kan anten malast opp til spon, kanskje brukast til sponplater eller brukast til energi, forklarar Richard.

Sorter avfallet undervegs

Richard tilrår at du organiserer avfallet undervegs i oppussinga. Bruk eigne sekkar eller behaldarar til ulike avfallstypar. Eit godt tips er å bruke dei blå Ikea-posane og skrive på kva som skal oppi. Større materiale kan du legge i haugar.

På Midtstegen gjenbruksstasjon kan du levere både bygg- og riveavfall, treverk, metall og farleg avfall.

Slik sorterer du avfallet

Treverk: Ubehandla og malt treprodukt kan leverast som trevirke, medan lakka eller impregnert tre må sorterast separat og kastast i riktig konteinar.

Bygg- og rivingsavfall: Gips blir sortert som gips og har eigen konteinar. Vinyl og linoleum skal kastast i eigne konteinarar hos oss då desse reknast som farleg avfall.

Metall: Små mengder av spikrar og skruar kan kastast i restavfall. Har du større mengder med spikrar som ikkje er brukbare, leverer du dei på gjenbruksstasjonen saman med metall. Det er viktig at du ikkje sorterer spikrar og skruar i konteinaren for glas- og metallemballasje, då det øydelegg for gjenvinningsprosessen.

Farleg avfall: Måling, lim, lakk, batteri og kjemikaliar må leverast som farleg avfall på gjenbruksstasjonen.

Møblar: Brukbare møblar kan leverast til gjenbrukshallen. Øydelagde møblar skal sorterast etter materialtype og kastast i riktige konteinarar.

Isolasjon: Isolasjonsmaterialer skal sorterast saman, og blir levert som farleg avfall.

Elektrisk avfall: Elektrisk avfall som stikkontakter, leidningar, brytarar og lys skal sorterast separat og leverast til gjenbruksstasjonen.

Plastemballasje: Plastfolie, tomme og tørre målingsspann i plast og transportemballasje i plast kan sorterast saman og leverast som plastavfall.

Her kan du søke på kva avfall som skal sorterast kor